फ़ैंकू भाई साहब रो इन्टरव्यू

बहुत दिनों सूं इच्छा ही के फ़ैंकू  भाई साहब  रो भी इंटरव्यू लियो जावे, क्यूं कि फ़ैंकू भाई साहब  री लम्बी लम्बी फ़ेंकण में मास्टरी है, लोग लपेटता ही रै जा ने फ़ैंकू  भाई साहब  फ़ैंकियो ही जावे........

तौ सा,..... हाची गळी रे मोड म्हाते टकर ग्या मन्ने फ़ैंकू भाई साहब  , ने मैं कर लियो औन द स्पौट व्योंरो इंटरव्यू.....
मैं कैयो फ़ैंकू भाई साहब  कई हाल चाल है?
                                                  

फ़ैंकू भाई साहब कैयो ; कई बताऊं यार एक तो ओ ओबामा मन्ने मिस कौलों दे दे ने दुखी कर काडियो है..
                                                                                                  
मैं कैयो..ओबामा ? वो अमरीका रो राष्ट्रपति? ने आपने मिस कौलों ?
फ़ैंकू भाई साहब कैयो ; हौं यार, जरे अबार तार घर जा ने उने पाछी कौल कर ने आयो हूं...

मैं कैयो ; तार घर ?  पण कौल रिटर्न करण वास्ते तार घर क्यूं गया, आपरे मोबाइल सूं इज पाछा लगा लेवता.
फ़ैंकू भाई साहब कैयो ; आ इज तो थों लोगो ने ठा कोनी, कि एस.टी.डी. लागे ० लगा ने, आई.एस.डी. लागे ०० लगा ने, पण ओबामा रो मोबाइल स्पेसल है, उने वास्ते ००० लागिया करे ने आ सुविधा तार घर में इ ज उपलब्ध है...
मै कैयो ; वाह फ़ैंकू भाई साहब वाह आप तो नयो ज्ञान दे दियो आज...पण आपने ठेठ तार घर जावण री तकलीफ़ उठावणी पडी....
फ़ैंकू  भाई साहब  बोलिया ; नहीं रे ....वो तो तार घर रे बारे मतीरा सप्लाई करण वास्ते गयो हो रे जरे ओबामिये ने कौल कर ली नहीं तो चला ने मैं उने कौल करण वास्ते कोई जाऊं जैडो हूं कई , किने कने टैम पडी है इत्ती......
मै कैयो ; सही है फ़ैंकू भाई साहब ..पण आ तो बताओ ओबामा कैवतो कई हो?......
फ़ैंकू भाई साहब बोलिया ; अरे की कोनी रे मतीरा चईजता उन्ने,
                                            
मै भी साप सट्ट कै दियो, अबार पौसिबल कौअन्नी.
मैं पूछियो ; क्यूं पौसिबल कोनी फ़ैंकू भाई साहब  ?
वे बोलिया ; अरे थने ठा कोनी यार ...मतीरा सप्लाई करण में म्हारा हारा हवाई जहाज बीजी चाल रिया है, उत्तर भारत में गर्मी पडे टंकार, रोज री ४०-५० ट्रिपों कराऊं जरे सप्लाई पूरी पडे, अबे इण बीच में मतीरा भर ने हवाई जहाज ने वौसिंग्टन भेजणो पौसिबल कोनी रे. ने अबार रौल में झौळ नैरी है...

मैं पूछियो; कई रौळ में झौळ हु गी फ़ैंकू  भाई साहब 
वे बोलिया ; म्हारा दो हवाई जहाजों रा तो सेल्फ़ स्टार्ट खराब हुयोडा है, १५० लोग रन वे माते उने घक्को लगावे जरे पायलेट खट्ट करती रो फ़स्ट गेर में घाल ने उडा ने ले ने जावे.

                                                                   
अमरीका भेज दियो उण हवाई जहाज ने तो पाछो उठे ऊं धक्को कुण लगाई...निरा ई लोचा हुया करे बाबू साब, इण मतीरे रे एयर सप्लाई धन्धे में....

जित्ते क फ़ैंकू भाई साहब बोलिया...अरे टैम कई हु गी यार?
मैं कैयो ; क्यूं आपरे कने हवाई जहाज तो है पण एक घडी तक कोनी ?
फ़ैंकू भाई साहब आ हुणतो इ मोटरसाइकल स्टार्ट कर ने रवाना हूवण लाग ग्या, पण फ़ैंकू भाई साहब तो फ़ैंकू है...तो रवाना हूवता हूवता बोलिया....अरे म्हारे कने तो सोने रे डायल माते १,२,३,४ वाळी जगह हीरा लागोडा वली घडी है, हमें उनो पट्टो चौंदी रो बणवावण वास्ते दियोडो है....जिको लेवण वास्ते होनारों री घाटी जाऊं रे.....ने फ़ैंकू भाई साहब   मुलकता हुआ, ढर्रर्रर्र...निकळ ग्या.





:- के.बी.व्यास